Нэрийг нь зэрвэсхэн уншвал

Нээрэн би өөртөө ялагдчихаад сууж байна
Нэргүй үгстэй хэдэн нүүдэл өрчхөөд сууж байна
Юу ч олохгүй энэ тоглоомын
Нэрийг нь зэрвэсхэн уншвал
Амьдрал гэсэн байна

Энэ миний шөнө байг

Сарны тэмдэгтэй зүрх минь
Санаа алдаж байна
Сарны хишигтэй зурагдсан заяа
Алганы хээнд гэрэлтэж байна
Энэ миний шөнө байг
Энэ миний сар байг

Тэр зүгээс шүлэг урсаг
Тэр миний цагаан тал байг

Тэр зүгээс бороо шиврэг
Тэр миний хайр шингээсэн нулимс байг

Тэр зүгээс салхи сэрвэгнэг
Тэр гэгээнээс үүсэж ургасан зүүд минь байг

Энэ оршихуйгаа энэ шөнө дэлгий
Үүл халхлавч
Гэрэлтэж байг
Сарны гэрэлтэй бодлууд минь
Хайрлах ухаарахын туяа татуулан
Чиний зүрхэнд гийж байг

Тиймээ энэ шөнө
Тэр чигээрээ би байгээ

Ганцаардал

Ганцаардал энэ шидэт үг
Галгүй зуухан салхи исгэрэхэд
Сэтгэл дулаацуулах шидтэй
Ганцаардал энэ гайхамшиг
Түг түмэн мэдэхгүйн гогцооноос
Дүүжин өлгөөд саран дор
Савлаж суухад
Шөнийн тэнгэрт одод холбон
Шүлэг бичүүлэх шидтэй

Ганцаардал хүмүүсийн дунд
Амьдарч буй зүрхний минь хаяг

Ганцаардал хүслээс ангид сэтгэлийн минь
______Таних тэмдэг
____________Ганцаардал ...

Юу ч үгүй тэнд санаа минь оршдог

Саргүй наргүй салхигүй хургүй
Үгүй
Юу ч үгүй тэнд санаа минь оршдог
Үүл байхгүй сүүдэр байхгүй
Жаргал зовлон байхгүй
Жам ес үхэл хагацал байхгүй
Зоргоороо хоосон байхгүйд би оршдогоо

Магадгүй айдаг болоод тэднийг
Хардаггүй ч юм уу

Маргаашийг өчигдрийг ч мэддэггүй байх

Өөрчлөлт өгөршил өвдөлт шаналал
Баярлах гуних гэдэг бас л тэнд байхгүй ээ
Тэр газарт би байхгүй мэт оршдог оо
Орон зай цаг хугацаа даажсан
Огоорч мартах гомдох уучлах байхгүй
Омголон ааш олиггүй мэхлэлт байхгүй
Сайн нь муу үгүйгээр харагддаггүй
Саар нь сайхангүйгээр оршдоггүй
Сав шимийн бус оргүй хоосонд
Орших оршихгүйн орчилд багтаж уусдагаа

_________________________2006 он