Зайдгай урсгахад

Нулимсанд тайтгарал оршином
Нууцхан тансаг амт байнам
Цээж эгшээн санаа алдаад
Задгай урсгахад
Цэнхэр тэнгэрийн энгээр халих
Жигүүртний мэдрэмж
Цээжинд бялханам

Аль аль нь биш

Уруул өдөх дуранд
Хоромд автан улайсна
......
...
.
Амталж болох уруул
Балтай юу хортой юу ?
Хамаагүй
Амьдрах гэдэг амтлах уу ?
Ажиглах уу ?
Аль нэг нь бүрэн хариулж чадахгүй
Аа Тэгээд ....

Хэн хэнээ ойлгоно

Бороо газарт шингэнэ
Хэн хэнээ ойлгоно
Болохгүй юм үгүй
Бороо газарт шингэнэ

.......

Хоосон шарлангуй цэнхэр
Энэ их нэлэмгэр өдөр дор
Гунигтай алхахад л
Ойлгогдох шиг
Хамгийн амттай бүхэн
Хажуугаар зөрөхөд
Харамсахыг ч бас мартсан байх нь
Намрыг таньсных

Хальж эргэсээр чимээгүй тийш
Хамгийн их гэрлийн зүг
Үл жаргах үл зовох тийш
Үзэгдэхгүй одохуй
Харагдахгүй ирэхүй
Мэдэгдэхгүй жаргахуй

*******

Эрчилсэн урсгал
Чимээгүй зөөлөн
Хүссэн хүсээгүй
Чиггүй зүггүй
Аниргүй ээ

*******

Би энд байна
Бас байхгүй байна

Хэл ороход

Цаг хугацааны ард
Амь орно
Цаг хугацааны ард
Үнэ орно
Цаг хугацааны ард
Хэл ороход
Цаг хугацаа алга болчихсон байх...
Цаг хугацаатай хамт
Өнөөдөр явчихсан байх
/дутуу, гүйцээгдэхгүй л дутуу/

Навч ч бай нэг л юм

Үгүйн үнэн дүүрч
Тархинд эзэнгүйрэл ноёлоод
Үүлэн чөлөөний наран
Шинэхэн харагдавч учрыг нь ойлгоод
Догдлолд зай үгүйрч гэнэннийг гомдоогоод
Нялх дусал шар навчнаа унаж
Нэгдээд
Нэг л юм энэ орчлон бороо ч бай
Навч ч бай
.......

Зүгээр л хамаагүй уучлал байдаг

Тэмүүлээд байгаа сэтгэл байдаг
Тэлж тогтсон үгүйсгэл байдаг
Зүрхэн зүгээс салхин байдаг
Зүгээр л хамаагүй уучлал байдаг
Харахын хүрэхийн хүслэн байдаг
Хадгалж өрөвдөхийн хайран байдаг
Хаврын шинэ цасан хаяа нэг буй
Хачин адилхан тунирхал байдаг

*************

Гуньж өвдсөн зүрхэн
Дурлал гүрэмтэй
Гансарч хүлээсэн өдрүүд
Хүсэхүйн тайлалтай
Зүүдэлгүй юм шиг цаг хугацаа
Навчаа чимэхэд
Зүгээр л нэг намрын үлгэр
Өнөөдрөөс эхэлсэн байдаг

************

Хурьцаж дурласан өнгө
Хуйлаастай захидлын нууцлаг үг
Уншаад утгагүй
Уйлахад л ойлгогдох
Уртаас урт гудам
Бороо асгарсан шөнө

Мартамгүй сонгодог зураг болно

Аадар шиг
Зуурхан шаагиад өнгөрөх
Тийм богинохон
Тийм түрэмгий
Тийм догдлолт хайрыг
Энэ нууранд дээр оруулаад
Нэмэргүй дээ
Ус усаа танихгүй
Дусал бүхэн чинь оролдовч
Долгио түгээж цөхнө
Дуугүйхэн нуур чимээгүй залгина
Борооноос бүтсэн хайр
Миний сэтгэлд
Үл мэдрэгдэнэ
Бороо өөрийгөө мартана
Тэр дунд
Цувгүй залуу жиндэнэ
Мартамгүй сонгодог зураг болно
Намар орой шиг

Гомдож боломгүй орчлон

Сэрэхүйн баярт хуруу чичрэн догдлох
Сэмхэн одохвий гэхдээ
Чимээгүй дотроо чагнах
Зөөлөн мэдэрсээр олох, онох
Зүгээр энэ бүхний төлөө
Гомдож боломгүй орчлон

*******

Энэ мөч ямархныг чи мэднэ дээ
Шаналж буйгаа хэлээгүй ч
Мэдэрч байгааг чи мэднэ
Чамд ямар байгаа бол
Санаснаар биш дээ амьдрал
Зурснаараа л болохоос
Зуурхан бороонд дуртай сан
Чамаас асуухаа мартаж дээ


*******

Цэцгийн дэлбээнд шүүдэр зохих нь
Зохирол шиг

Аниргүйд алдсан санаа
Навчинд буух нь
Намар шиг

Хаа нэгтээгээс ирсэн гийчинд
Сэтгэлээ дайсан минь
Хайр шиг

Санамсаргүй он цагийг анзаарсан минь
Ухаарал шиг

Хөшигний завсараар тэр
Туяагаа илгээх нь
Гомдомхой сэтгэлийг аргадах шиг

Хөл дор хувцас хөглөрч
Амьсгал давчдах нь
Үргэлжлэл шиг

Явсан, гээсэн, үгүйрсэнд
Үл харамсаад бодолгүй болох минь
Ариусал шиг

Юу ч үгүй ирээд
Хүн болж амьдрах нь
Цэцэг ургах шиг

*******

Нүд аргана сэтгэл уйлна
Нүүсэн үүлсээс дусал үгүй холдоод одоход
Нутаг минь хөөрхий
Зангирч адгасаар өнөөдөрт итгэн тарчлахуй
Заамны товч чичрээд
Сэтгэл дотроо мэгшихүй