Хожуу л

Шаагиад л байсан

Аадар л байж

Шалба норсноо сая л мэдлээ

Алхаад л байсан юм

Амьдраад л  байж

Амьдрал ийм л амттайг

Хожуу л мэдлээ дээ

***

Хар өнгөтэй энэ даашинзыг чинь

Хайчлаад богиносгоод

Ханзлаад навч оруулж зүйгээд

Намрын шөнө гэчихье

*********

Олоон даашинзтай ганган бүсгүй

Намар, хавар, зун, өвөл шиг

Тийм ганган

Ганц сандалтай

Цонхоор нь нар дүүрэн асгарсан
Ганц сандалтай
Тавилгаггүй өрөө
Төсөөлж байна уу?
Нар уруу харуулж тавьсан
Модон сандал дээр нь
Навч дулаацдаг юм

Цаг хугацаа чи

Нөхцөл байдал
Өчигдрийг амилуулж
Өнөөдрийг дарамталж
Маргаашийг үгүйсгэхээр
Бүрэлдэн байхуй
Цаг хугацаа чи
Мэдрэхгүй л байна уу эсвэл
Энэ бурханд л хамаатай юу?

Маргааш ирэхгүй удна

Амттан идэж дуусаад хуруугаа тамшаах шиг
Өчигдрийн өвөр түрүүг тэмтчин
Өнөөдрийн дутууг дүүргэх гэсэн
Санааг минь
Цаг хугацаа ойлгочих шиг
Маргааш ирэхгүй удна